मसिर ४
भारत सरकारको आर्थिक सहयोगमा प्युठानको ऐरावती गाउँपालिका–१, अमिलीस्थित श्री दाङवाङ माध्यमिक विद्यालयमा निर्माण भएका नयाँ विद्यालय भवन तथा छात्रावास संरचनाको एक समारोहबिच उद्घाटन गरिएको छ। भारतीय राजदूतावास, काठमाडौँका काउन्सलर गीताञ्जली ब्रैंडन तथा ऐरावती गाउँपालिकाका अध्यक्ष नविल विक्रम शाहले संयुक्त रूपमा भवन उद्घाटन गरेका हुन् । समारोहमा राजनीतिक प्रतिनिधि, सरकारी अधिकारी, स्थानीय समुदाय, विद्यालयका शिक्षक–शिक्षिका, विद्यार्थी तथा अभिभावकहरूको उल्लेखनीय उपस्थिति रहेको थियो।उच्च प्रभाव सामुदायिक विकास परियोजनाअन्तर्गत भारत सरकारको अनुदान सहयोगबाट विद्यालय भवन, छात्रावास तथा अन्य सहायक संरचना निर्माण गरिएको हो। परियोजना ऐरावती गाउँपालिकामार्फत कार्यान्वयन गरिएको थियो।
दाङवाङ माध्यमिक विद्यालय प्युठानको ग्रामीण भेगमा अवस्थित अग्रणी सामुदायिक विद्यालयमध्ये एक मानिन्छ, जहाँ ईसीडी (प्लेग्रुप) देखि कक्षा १० सम्म २३४ विद्यार्थी अध्ययनरत छन्, जसमा करिब ६० प्रतिशत छात्रा रहेको विद्यालयले जनाएको छ।
समारोहका वक्ताहरूले भारत सरकारद्वारा प्रदान हुँदै आएको दीर्घकालीन विकास सहयोगप्रति कृतज्ञता व्यक्त गर्दै नयाँ पूर्वाधारले विद्यार्थीहरूको सिकाइ वातावरण सुधार गर्न महत्त्वपूर्ण योगदान पु¥याउने विश्वास व्यक्त गरे। उनीहरूका अनुसार, आधुनिक भवन र सुविधाले गुणस्तरीय शिक्षा सहज बनाउने मात्र होइन, यस क्षेत्रको समग्र शैक्षिक विकासमा पनि टेवा पुग्नेछ।
भारत र नेपालबिचको छिमेकी सम्बन्ध, विकास साझेदारी र बहुक्षेत्रीय सहकार्यलाई झल्काउने यस परियोजनाले नेपाल सरकारका प्राथमिकता रहेको पूर्वाधार विकास तथा समृद्धि हासिल गर्ने अभियानलाई थप मजबुती प्रदान गरेको भारतीय पक्षको भनाइ छ।